| 琴晚打畀佢傾計，傾傾下傾到D我好擔心o既問題。終於明白少少o既犯錯，已經可以影響幾個月，琴日傾完之後，有D驚，有D擔心。直至到今朝擔心，驚都冇減少過，甚至懷疑自己可唔可以好似當冇事咁出街見佢，只不過，我要一心諗住事情仲有轉彎餘地，要有信心，所以今日如常出去。今朝特登好早起身，雖然琴晚成三點幾幾先訓，如果平時唔一點都唔起身。雖然今天約好兩點等，計埋車程最多四十五分鐘搞掂，但係為左唔遲早到，我居然十二點半就出門口。
開頭真係幾難過，搞到行街都好似各有各行，各有各睇咁，只不過去到美麗華間UNIQLO好似熱完身咁，開始個人慢慢定落黎，揀下衫，見好有新出好靚o既STAR WARS X UNIQLO T恤，雖然好想買多件，只不過揀到尾都得件Darth Vader黑武士睇得上睇，諗住睇下會唔會有細佬想買o既《聖鬥士星矢》系列，不過睇黎日本UNIQLO就有，香港就冇啦。
之後就諗住買多隻POLO，不過就睇唔o岩。講起POLO，有段小插曲真係嚇死我....XD到最後又諗住買件恤，結果就反而買左條用黎襯件恤衫o既褲而放棄左件恤衫...真係趣~~
之後行左陣無良印物玩左陣筆，之後再落Sogo行左陣，食左個下午茶就撇，不過原來我真係好食得甜，買左個好大好多cream好多朱古力，不過都好好食~~
之後就搭巴士走，o係巴士度同佢傾左好多野，覺得好似好耐傾得好多啦...佢返屋企之後，我就走LU
|
| |
| 睇返個月曆今日都已經係七月尾，八月就快來臨，回顧返畢業之係到今日，都過得十分充實，自己夠膽話係冇浪費過一日。
首先畢業之後繼續Keep住咁返之前Neway o既兼職，同時亦開始正式為搵長工做準備，寄下履曆咁。好幸運其中一間酒店有收到我o既履曆之餘，仲畀我面試o既機會我，所以我邊返兼職，一邊抽兩日時間出黎去酒店見人力資源同事同埋餐飲部經理，雖然問左好多野，都差D問到口啞啞，但係最後面試相當理想，正式聘用只差驗身一步。
當越近驗身o既一日，我就開時要做決定，究竟辭唔辭左份兼職好呢？雖然酒店叫得我去驗身，根據酒店內相熟o既人士講基本上已經十拿九穩，但係始終都差驗身一環，如果驗身報告唔理想，就算再合用，酒店都唔會聘請，咁白白辭職o既話就會即時失業。但後如果我要確實等到驗身報告出左先去辭份兼職o既話，又要等多七日之後先正式離職，早前酒店講明唔想拖咁長時間，所以睇黎等到驗身報告出左先辭職應該係冇可能o既事。
最終我決定博一少個險，先計好七日預早通知咁就去辭職辭，再等驗身報告。驗身結果果然合格，只差簽約就正式成為酒店員工。最出奇就係，經過我精密o既計算之下，居然可以安排到兼職離職翌日就緊接到酒店簽約正式入職，真係一日都冇浪費過！！哈！
返左接近兩個禮拜，發現其實做o既同金葉庭無異，不過當然有多少少野要記，要做啦。真係開始踏入社會，真正要諗下、計劃下日後點，未出糧已經諗好幾多錢要畀阿媽、幾多錢要儲起佢。說實話真係好喜歡酒店o既工作環境，好鐘意o係大公司做野o既感覺，好鐘意酒店善待員工同有褔利o既感覺，只可惜有權利必有義務，自己o既工作，長遠黎講未必係自己所鐘意，可能太辛苦、可能太過刻板......
究竟應該為左背後o既褔利同薪金繼續長做落去，還是係做自己鐘意o既野，不惜放棄幾有前途o既工？？我真係諗到依一刻都未諗到，只係聽阿媽依D明燈講，好好醜醜都做一年先，畀時間自己去感受下，感受下係唔係真係適合自己。就算最後都係辭工，起碼做左一年，日後見工o既時候，畀新僱主見到，都唔會覺得自o係玩玩下，做兩下又唔做o個D冇耐性o既人......
最後，依幾日都好似有D失調o既感覺，幾度叫人有想辭職o既感覺，心裡面同上帝講希望有新D火花，令我依D失調感冇咁重。點知今日返工居然玩迎新日，幾個新同事都上課程，講解下權利同義務，又再次提返起我對酒店o既興趣，又再次叫我放眼世界，唔好諗住會成世屈o係一個細細o既中菜廳，成世做一個細細o既侍應！
|
| |
| 宜家無線差唔多個個禮拜六、日都有戲做，上個禮拜就睇左《全職殺手》，十分有劇力同剌激，今個禮拜又冇戲上映，就係郭在容04年作品《野蠻師姐》.....套戲成夜晚點幾兩點先做，畀無線播下又停下播廣告，搞到睇睇鐘都成三點半先做完，雖然係咁，不過套戲都吸引住我去捱眼訓睇埋佢...
套戲一開頭貫徹韓劇搞笑風格，講述身為女警o既呂童珍同男主角高明宇係一次捉賊o既時候認識，由於童珍行為大膽野蠻，搞到笑料百出，其於童珍性格可愛o既關係，明宇亦好快愛上佢，兩人甚至一齊破案。可惜一次捉捕越獄大盜申昌守o既過程中，警匪互相駁火，明宇畀流彈所傷死去.....
童珍痛失男友令佢視死如歸，做無件事都完全唔顧性命，亦因為咁成為警隊中o既殺師姐，可惜童珍心中只係諗住o係明宇死後o既「尾七」之前重見明宇。人死不能復生，明宇o既死已係鐵般的事實。
童珍果然o係明宇「尾七」o個日再遇明宇，可惜明宇只係返黎同佢道別，可以做o既，只係會化成風咁守護住童珍，而且講會有個同佢自己極相似o既出現代替自己照顧童珍......
套戲D劇情大約係咁，一開頭畀佢o既笑料吸引睇落去，睇到佢地甜蜜溫馨小情人浪漫o個陣，好快就轉入生離死別，好似覺得好多野都太快，太短暫。女主角細個已經失去左家姐，宜家又冇埋男友真係十分慘，一個悲情o既人物，加上角色由全智賢演出，望到佢o個個又靚又好似好脆弱既o小女人o既款，真係鄧佢慘.....
雖然成套戲亦貫徹韓劇鐘以拖戲，拖時間o既特色，不過個心依然好想睇個結局(縱使細佬o係套戲開首已經爆晒結局)，直到最後，女主角o係男主角o既「帶領」之下搵到代替舊情人o既新男友，理應可以理解為「大團圓」結局。只不過，我反而覺得出現由車太弦客串o既依個「新男友」角色簡直係多此一舉，而且係成套戲o既一大敗筆。
當觀眾由片首睇到落結局，睇埋好多玩野，誤導觀眾o既情節，觀眾想見到，都係明宇冇死，最後有情人終成眷屬o既一幕，可惜最後，只係出現一個代替品.....依個結局，唔通就係所謂「冇左個橙，都執返個桔」？？觀眾睇左明宇o既死對童珍o既打擊之後，好難會相信童珍會「移情別戀」去「代替情人」身上，即使「代替情人」係明宇「欽點」都唔會。
咁o既情節尤如觀眾可能寧願睇住《鐵達尼號》o既綺溫斯莉同里安納度狄卡比奧雙雙慘美咁死去，都未必想死剩綺溫斯莉咁孤獨，更加唔會想睇肥溫避過大難之後，識左另一個靚仔而忘記左曾經同佢出生入死，一齊經歷左好多野o既里安納度狄卡比奧.....
雖然存在一大敗筆而且套戲好慘下，不過都覺得好好睇....只係個結局有D唔開心，不過，套戲應該好睇在有個唔開心o既結局，先令人咁深刻難忘，玩悲情，始終都係日韓o既拿手好戲......
|
| |
